Еврокомиссия Украинадан Европа Иттифоқига кириш бўйича сўровноманинг иккинчи қисмини олишни кутмоқда. Киевга номзод мақомини бериш-бермаслик бўйича қарор июн ойида қабул қилинади. Бу ҳақда Еврокомиссия раҳбари маълум қилди.
“Кеча “Еттилик гуруҳи” президент Зеленский билан музокаралар ўтказди. Биз Украинани Европа йўлида қўллаб-қувватлашни муҳокама қилдик. Анкетанинг иккинчи қисмини олишни интиқлик билан кутаман. Европа ўз қарорини июн ойида қабул қилмоқчи”, — деб ёзди у Твиттерда.
Аввалроқ Зеленский Твиттерда Украина Брюсселга сўровноманинг иккинчи қисмини тақдим этиши, унинг асосида Еврокомиссия Украинага ЕИ номзоди мақомини бериш бўйича тавсия бериши кераклигини айтган эди.
Киев ўз сўровномасининг биринчи қисмини 17 апрель куни Брюсселга топширган.
Бу борадаги муҳокамалар жараёни бир неча йил давом этиши мумкин. Финляндия бу йўлни энг тез - уч йил ичида босиб ўтди. Энг узуни Туркия бўлиб, у 2005 йилнинг кузида Европа Иттифоқига кириш бўйича музокараларни бошлаган. Бугунги кунга келиб ҳам уларни якунлаш истиқболлари кўринмаяпти.
