Ўзбекистонда айрим суғурта ташкилотларининг лицензияси тўхтатилди. Чунки...

ИҚТИСОДИЁТ 24.05.2022, 12:20
Ўзбекистонда айрим суғурта ташкилотларининг лицензияси тўхтатилди. Чунки...

“Лицензиялаш, рухсат бериш ва хабардор қилиш тартиб-таомиллари тўғрисида”ги Ўзбекистон Республикаси Қонунининг 32-моддасига асосан лицензия талаблари ва шартлари бузилиши аниқланганлиги сабабли, “Agros Hayot” суғурта компанияси акциядорлик жамиятининг 2021 йил 1 декабрдаги СФ 00024-сонли ҳамда “Farovon Sug‘urta” акциядорлик жамиятининг 2022 йил 25 февралдаги СФ 00046-сонли лицензияларининг амал қилиш муддати 2022 йил 23 май санасидан бошлаб ўн кун муддатга тўхтатилди. Бу ҳақда Молия вазирлиги ҳузуридаги Суғурта бозорини ривожлантириш агентлиги ахборот хизмати хабар бермоқда. 

Маълум қилинишича, ушбу давр мобайнида суғурталовчига янги суғурта (қайта суғурта) шартномаларини тузиш, шу жумладан, амалдаги суғурта (қайта суғурта) шартномаларини узайтириш тақиқланади. Илгари тузилган суғурта (қайта суғурта) шартномалари бўйича эса ўз зиммасига олган мажбуриятларини белгиланган тартибда бажариши шарт.

Суғурта ташкилотлари томонидан улар фаолиятидаги қонунчилик талабларининг бузилиши ҳолатлари бартараф этилганлигини асословчи ҳужжатлар ушбу муддат ичида Ўзбекистон Республикаси Молия вазирлиги ҳузуридаги Суғурта бозорини ривожлантириш агентлигига тақдим этилиши лозим.

Акс ҳолда, ушбу суғурта ташкилотларига нисбатан суғурта фаолиятини амалга ошириш учун лицензияларининг амал қилишини қонунчиликда белгиланган тартибда ўн кундан ортиқ, лекин олти ойдан кўп бўлмаган муддатга тўхтатиш чоралари кўрилади.

Бундан ташқари, Ўзбекистон Республикаси “Суғурта фаолияти тўғрисида”ги Қонунининг 35 ва 36-моддалари талаблари бузилганлиги сабабли, уларни бартараф этиш, акс ҳолда суғурта фаолиятини амалга ошириш учун лицензияларини тўхтатилиши юзасидан бир нечта суғурта ташкилотларига тақдимномалар киритилган.

Шарҳлар

Об-ҳаво: Тошкент
Валюта курси
1