Sevimli

“ОАВ қонунчилиги: ҳуқуқ ва мажбуриятлар чегараси қаердан ўтади?”

ЖАМИЯТ 03.07.2022, 12:33
“ОАВ қонунчилиги: ҳуқуқ ва мажбуриятлар чегараси қаердан ўтади?”

Журналистлар учун ҳар йили Адлия вазирлиги томонидан ташкил этиладиган семинар-тренинг учун бу сафар тоғли ҳудудлар танланди.

Икки кунлик интерактив машғулотлар давомида “New Media Education Center” ННТнинг малакали тренерлари, юристлар ҳамда халқаро эксперт Рене Фалькнер “Сўз эркинлиги ва шахсий ҳаёт дахлсизлиги: халқаро тажриба”, “ОАВ қонунчилиги: ҳуқуқ ва мажбуриятлар чегараси қаердан ўтади?” каби масалаларга асосий эътиборни қаратди.

Семинарда иштирокчиларга жамоатчиликнинг турли гуруҳлари учун ахборотни тақдим этиш, ижтимоий тармоқлардаги саҳифалар учун контент тайёрлаш ва унинг сифати, фейк хабарларни аниқлаш ва факт чекинг воситаларини қўллаш усуллари айтилди.

Шунингдек, иштирокчилар ҳуқуқий манбалар (lex.uz, advice.uz, legaltech) билан ишлаш масалаларини кўриб чиқди. Журналист ва блогерлар учун “Huquqiyquest” интеллектуал ўйини ҳам ташкил этилди.

Бўлиб ўтган тренинг нафақат билим олиш ва кўникмаларни ошириш, балки ўзаро фикр, тажриба ва ғоя алмашиш майдонига айланди.

Бундан ташқари, семинар иштирокчиларига Адлия вазирлиги ташаббуси билан чоп этилган “Рақамлаштириш даврида медиа ва фейк хабарлар: ҳуқуқий ва ахлоқий омиллар” китоби тақдим этилди.

Ойбек ШУКУРОВ.

Шарҳлар