Sevimli

Ўзбекистонда этнотуризм ва этноспортни ривожлантириш муҳокама этилди

ЖАМИЯТ 05.08.2022, 19:25
Ўзбекистонда этнотуризм ва этноспортни ривожлантириш муҳокама этилди

Бугун, 5 август куни пойтахтимизда "Марказий Осиё давлатларида миллатлараро тотувликни таъминлаш" мавзусидаги халқаро конференция доирасида "Этнотуризм ва этноспорт: хориж тажрибаси ва ривожланиш истиқболлари" мавзусида семинар ўтказилди.

Мазкур кўргазмага Ойбек Норинбаев раҳбарлигидаги Ўзбекистон Этноспорт федерацияси ҳам ҳамкорлик қилди.

Семинарни очиб берган Туризм ва маданий мерос вазири маслаҳатчиси Темур Мирзаев республикамизда туризм соҳасини янада ривожлантириш, аҳолини ички туризмга кенг жалб қилиш, инфратузилмани яхшилаш, туризм салоҳияти юқори бўлган ҳудудларнинг ўзаро боғлиқлигини таъминлаш орқали туристлар саёҳати учун қулай шарт-шароитлар яратиш, маданий меросни муҳофаза қилишга қаратилган комплекс чора-тадбирлар босқичма-босқич амалга оширилаётганини таъкидлади.

"Юртимизнинг мавжуд сайёҳлик салоҳиятидан самарали фойдаланиш жараёнида жамоат ташкилотларининг ролини янада ошириш, уларнинг ҳали деярли ишга солинмаган имкониятларини сафарбар этиш соҳа ривожида муҳим ўрин тутади. Шу муносабат билан мамлакатимизда айнан туризм соҳасида фаолият кўрсатаётган жамоат ташкилотлари фаолиятини ривожлантиришга алоҳида эътибор қаратилмоқда. Бугунги тадбиримиз доирасида этнотуризм ва этноспорт йўналишидаги ташкилотларимиз фаолияти, уларни ривожлантириш истиқболлари, мамлакатимизда истиқомат қилувчи турли миллатларга оид туристик этномаҳаллалар ва этномажмуаларнинг турли халқлар орасида маданий-маърифий алоқаларни мустаҳкамлашдаги ролига оид маълумотлар билан танишиш имконига эга бўласиз"  – деди Темур Мирзаев.

Семинар давомида "Сайёҳлик Маҳалла" электрон платформасини яратиш", "Ўзбекистонда этноспортни ривожлантириш имкониятлари", "Туркман этномаҳалла "Улли-ҳовли", "Туризм қишлоқлари", "Этнотуризм: хорижий тажриба ва Ўзбекистонда этнотуризмни ривожлантириш истиқболлари", "Гастро маҳалла лойиҳаси" каби мавзуларда маърузалар тингланди.

Семинар якунида Туризм ва маданий мерос вазири маслаҳатчиси Темур Мирзаев томонидан: қуйидаги хулоса ва таклифлар илгари сурилди:

— Ўзбекистон Республикаси ҳудудида истиқомат қилувчи турли миллатлар, шунингдек, қўшни давлатларнинг қадимий урф-одатлари ва миллий спорт ўйинларини сақлаб қолиш ва ривожлантириш, ушбу йўналишда турли ҳамкор тадбирлар ва мусобақаларни ташкиллаштириш орқали жамиятда бағрикенглик ва инсонпарварлик маданиятини ривожлантириш, миллатлараро ҳамжиҳатликни, фуқаролар тотувлигини мустаҳкамлаш борасида иш олиб бориш;

— қўшни давлатлар орасида қадимий миллий урф-одатларни тиклаш, ички туризмни ривожлантириш, инфратузилмани яхшилаш, маданий меросни муҳофаза қилишга қаратилган ягона ОАВ платформасини яратиш.

Ойбек Шукуров.

Шарҳлар