Баскетбол афсонаси Майкл Жорданнинг 1998 йилги NBA финалида кийган, дастхати туширилган формаси 14 млн долларга сотилди. Бу баскетболга оид коллекцион буюмлар орасидаги энг қиммат савдо рекорди бўлди. Бу ҳақда The Guardian хабар берди.
Жордан "Чикаго Буллз" сафида финалнинг иккинчи ўйинида ушбу формани кийган. Ўша баҳсда у 37 очко тўплаб, учрашувнинг энг сермаҳсул ўйинчиси бўлган. Кейинчалик Жордан жамоаси билан финал сериясида 4:2 ҳисобида ғалаба қозониб, NBAдаги олтинчи ва сўнгги чемпионлик титулини қўлга киритган. У олтита финалнинг барчасида энг қимматли ўйинчи деб топилган.
Спортга оид коллекцион буюмлар орасида ҳозиргача фақат бейсбол афсонаси Бейб Рутнинг 1932 йилги Жаҳон сериясида кийган формаси бундан қимматроққа сотилган. Ушбу форма 2024 йилда 24,1 млн долларга харид қилинган.
Баскетболга оид аввалги рекорд эса Жордан ва Коби Брайант тасвирланган карточкага тегишли бўлиб, у ўтган йили 12,9 млн долларга сотилган эди. Жорданнинг ўйинда кийган буюмлари орасидаги аввалги рекорд ҳам яқинда янгиланган: 1998 йилги финалнинг учинчи ўйинида кийилган, дастхатсиз форма икки ҳафта олдин 12,3 млн долларга сотилган.
Янги рекорд ўрнатган формани Майамилик кўчмас мулк инвестори Рон Фирман Hunt Auctions аукцион уйи орқали хусусий келишув асосида харид қилган. Аукцион уйи президенти Дэвид Ҳантнинг айтишича, Жорданнинг буюмлари энди машҳур санъат асарлари каби қимматбаҳо активлар қаторига кирмоқда.
