Сирдарё вилоятининг Мирзаобод туманида содир бўлган ЙТҲда тўрт киши ҳалок бўлди. Бу ҳақда вилоят ИИБ ахборот хизмати хабар берди.
Маълум қилинишича, жорий йил 3 сентябрь куни Мирзаобод туманининг "Турғун Аҳмедов" маҳалласи ҳудудидан ўтувчи А373 автомобиль йўлининг 22-километрида Термиз—Тошкент йўналишида ҳаракатланаётган 36 ёшли ҳайдовчи бошқарувидаги "Lacetti" йўлнинг қарама-қарши йўналишида ҳаракатланиб келаётган "Nexia-2" билан тўқнашиб, йўл-транспорт ҳодисасини содир этган.
Оқибатда "Nexia-2" ҳайдовчиси ва унинг ичида бўлган уч нафар йўловчи олган тан жароҳатлари оқибатида воқеа жойида вафот этган. Яна бир нафар йўловчи эса Оқолтин тумани тиббиёт бирлашмаси жонлантириш бўлимига жойлаштирилган.
