Бугун, 13 сентябрь куни "Ўзбекфильм" киноконцерни”да XIV Тошкент халқаро кинофестивали доирасида ШҲТ давлатларининг кинофоруми бошланди.
Кинофестиваль дастурининг амалий ва ишбилармонлик қисмини ШҲТ мамлакатлари Кинофоруми ташкил этади. Унда кинофестиваль учун Ўзбекистонга ташриф буюрадиган барча давлатларнинг делегациялари иштирок этмоқда.
Унинг доирасида ШҲТ мамлакатлари ўзларининг кино саноати ҳақида сўз юритадилар. Бу эса янги алоқаларни ўрнатиш ва унумли ҳамкорлик учун умумий асосларни излашга ёрдам беради.
Кинофорумда ХIV Тошкент халқаро кинофестивали директори Фирдавс Абдухаликов нутқ сўзлади.
“Ўзбекистон Республикаси Президенти Шавкат Мирзиёев ташаббуслари билан мамлакатимизда миллий кинематография тизимида сезиларли ўзгаришлар амалга оширилмоқда. Илк бор 1958 йилда ўтказилган Тошкент Халқаро кинофестивалининг тикланиши бунга яққол мисол бўла олади. Афсонавий кинофестиваль орадан 24 йил ўтиб қайта тикланди ва дунёнинг машҳур кино анжуманлари қаторидан жой олди. “Тинчлик, маърифат ва тараққиёт учун” шиори унинг мақсад ва вазифаларини ўзида яққол ифодалайди.
Бугун биз дунёнинг 40 та давлатидан ташриф буюрган 500 га яқин киноижодкорлар, актёр ва актрисалар, режиссёр ва операторлар, продюсер ва кинотанқидчилар, киношунослар, оммавий ахборот воситалари вакилларини қутлашдан беҳад мамнунмиз.
“Ипак йўли дурдонаси” ХIV Тошкент халқаро кинофестивали доирасида “ШҲТ кино кунлари”, “Жаҳон киноси кунлари”, “Ҳужжатли фильмлар кунлари”, “Ретро кино кунлари”, “Ўзбекистон киноси кунлари”, Халқаро туркий маданият ташкилоти («ТУРКСОЙ») кинофоруми, “МДҲ мамлакатлари миллий киностудиялари раҳбарларининг учрашуви” ва бошқа кўплаб тадбирлар ўтказилиши режалаштирилган. Шунингдек, 50 дан ортиқ тадбирлар, давра суҳбатлари ва форумлар, маҳорат дарслари ва ижодий учрашувлар ўтказилади. Натижада янги қўшма кинолойиҳалар юзага келади. Айнан ушбу фестиваль доирасида дунёнинг ўнлаб давлатлари билан ҳамкорликда киномаҳсулотлар яратиш бўйича 20 га яқин меморандум ва келишувлар имзоланиши қувонарлидир.” – деди ХIV Тошкент халқаро кинофестивали директори Фирдавс Абдухаликов.
Шунингдек, кинофестивалда барча мамлакатлар делегациялари ва улар тақдим этадиган лойиҳалар тақдимоти ўтказилиши режалаштирилган.
Шунингдек, учрашувлар давомида тор доирада бизнес-музокаралар, «B2B» форматдаги қўшма ишлаб чиқариш имкониятларини муҳокама қилиш ва икки томонлама форматдаги бизнес лойиҳалар тақдимоти режалаштирилган.
Музокаралари давомида бир қатор ҳамкорлик меморандумлари имзоланиши кутилмоқда.
