Azur Air авиакомпаниясининг Perm-Goa рейси бомба таҳдиди туфайли Ўзбекистонга йўналтирилди, дея хабар қилди Ҳиндистон фуқаро авиацияси вазирлигига таяниб ТАСС.
“Самолётга бомба ўрнатилгани ҳақида электрон почта хабари келиб тушганидан сўнг маҳаллий вақт билан соат 12.30 да Даболим аэропорти директори томонидан рейс бошқа жойга йўналтирилди”, - деб хабар берди Ҳиндистоннинг ANI агентлиги.
Расмийларга кўра, самолёт бортида 240 га яқин одам бўлган.
Қайд этилишича, бундай ҳолат иккинчи марта кузатилмоқда. 9 январь куни Россиянинг Azur Air авиакомпаниясининг Москва-Гоа йўналишида 244 нафар йўловчи ва экипаж аъзолари билан парвоз қилаётган самолёти бортидаги ёлғон бомба хабари туфайли Ҳиндистоннинг Гужарат штатига фавқулодда қўнишни амалга оширган.
Эслатиб ўтамиз, сал аввал Бангкокдан Москвага учаётган самолёт ҳомиладор аёлнинг муддатидан аввал бошланган дарди туфайли Самарқандга фавқулодда қўнган эди.
