Наманганда аёл ЙПХ автомобилида туғуруқхонага олиб кетилаётганида фарзандини дунёга келтирди. Бу ҳақда ЙҲХХ матбуот хизмати хабар бермоқда.
Маълум қилинишича, 4P-112 Фарғона халқа автомобиль йўлининг 20 километрида хизмат олиб бораётган Наманган вилояти ЙҲХБ ЙПХ 5-сафарбарлик гуруҳи ходимларига йўл четида тўхтаб турган Cobalt автомашина ичидан аёл киши тушиб, келинини туғрқухонага олиб боришда кўмак сўраган.
Шундан сўнг, ИИБ ходимлари ҳомиладор аёлни хизмат машинасига ўтказишади ва шифохонага олиб кетилаётган вақтда аёлнинг ҳолати ёмонлашади. Бола туғилиши яқинлашаётганини сезган ходимлар тез ёрдамни ҳам кутмай туғруқхона томон ҳаракатни давом эттирган. Аммо чақалоқ — қиз фарзанд манзилга етиб улгурмай ЙПХ автомобилида дунёга келган. Манзилга етиб боргча, шифокорлар томонидан кўрсатилган тиббий ёрдам сабаб она-боланинг саломатлигига ҳеч қандай зиён етмади.
