Қирғизистон президенти Садир Жапаров мамлакатнинг собиқ президентларининг биргаликда учрашувини ташкил қилиб, барчани бир-бири билан ярашишга таклиф қилган.
Жапаровнинг барча собиқ президентлар билан учрашуви кеча Дубайда бўлиб ўтгани маълум қилинди.
Йиғилишда 6 та президент, жумладан Жапаровнинг ўзи ҳам иштирок этди. Собиқ раҳбарлар амалдаги давлат раҳбарининг “бир мушт бўлиб бирлашиш” ташаббусини қўллаб-қувватлашган.
Президент матбуот котибининг тушунтиришича, учрашувда Асқар Акаев, Қурманбек Бакиев, Роза Отунбаева, Алмазбек Атамбаев ва Сооронбай Жеенбеков шахсан иштирок этган. Бу жой аниқ сабабларга кўра, нейтрал ҳудуд сифатида белгиланган.
Маълум қилинишича, собиқ президентлар ўтмишдаги хатоларини тан олишган ва бир-бирларини кечиришган. Жапаров таъкидлаганидек, учрашув унинг ташаббуси билан келажак ривожланиш учун ташкил этилган.
Алмазбек Атамбоев собиқ президентларнинг Дубайдаги учрашуви мамлакатнинг амалдаги раҳбари Садир Жапаров томонидан ўтказилганига изоҳ берар экан, у йиғилишда бошқа собиқ раҳбарлар ҳам бўлишини билмаган.
Атамбаев шунчаки амалдаги раҳбар билан юзма-юз суҳбатлашиб олиши ҳақида ўйлаган ва шунга кўра тайёргарлик кўрган.
Садир Жапаров ва унинг ўтмишдошлари ўртасидаги суҳбат якунида шундай вазият юзага келганки, Атамбаев, ўз сўзларига кўра, ўрнидан туриб учрашув хонасидан чиқиб кетган.
“Қирғизистонда бирдамликнинг ўрнатилиши ва Бакиевчиларнинг қайтиши бу бир биридан фарқли жиҳатлардир”, деб фикр билдирган Алмазбек Атамбоев.
