Президент Шавкат Мирзиёев инвесторлар ташаббусларини қўллаб-қувватлаш, лойиҳаларни келишиш жараёнини соддалаштириш ва йирик тижорат объектларини кўпайтириш зарурлигини таъкидлади. Янги тартибга кўра, ер майдонлари очиқ ташаббус ва “Swiss challenge” тамойили асосида ажратилади.
Давлат раҳбари Янги Тошкентнинг мастер-режаси мукаммал шаҳар барпо этиш учун ишлаб чиқилганини, бироқ у инвесторлар ташаббусларига тўсиқ бўлмаслиги кераклигини қайд этди. Агар таклиф этилаётган лойиҳа шаҳар манфаатларига хизмат қилса, ер майдони ёки объект турини ўзгартириш бўйича таклифлар қўллаб-қувватланиши лозим.
Таъкидланишича, инвесторлар таклифларини кўриб чиқиш тартиби мураккаб ва етарлича шаффоф эмас. Айрим қарорлар ойлаб чўзилмоқда. Шу боис таклифларни аниқ мезонлар асосида тезкор кўриб чиқиш вазифаси қўйилди.
Шунингдек, тадбиркорлар қизиқиш билдираётган “Санкт-Петербург” мавзесида концепция, лойиҳа ҳужжатлари ва қурилиш рухсатномаси олдиндан тайёрланган. Янги Тошкент дирекциясига бундай тайёр лойиҳалар сонини кўпайтириш топширилди.
Маълум қилинишича, ҳозиргача сотилган 54 та лотдан фақат учтасида лойиҳа қиймати 100 миллион доллардан ошади. Шу сабабли шаҳарнинг қиёфасини белгилайдиган йирик тижорат объектларини кўпайтиришга алоҳида эътибор қаратилади.
“Swiss challenge” тамойилига кўра, ташаббус очиқ эълон қилинади. Агар бошқа иштирокчилар бундан яхшироқ шартларни таклиф этмаса, ер майдони биринчи ташаббускорга ажратилади.
