АҚШ президенти Дональд Трамп Россия раҳбари Владимир Путин билан телефон суҳбатидан кейин Москва АҚШ ва жаҳон бозорларига дизель ёқилғиси етказиб беришга рози бўлганини маълум қилди. Унинг айтишича, Россия яқин вақтда 300 минг тоннадан ортиқ, ноябрь ойида эса яна 500 минг тонна ёқилғи етказиб беради. Кейинчалик етказиб бериш ҳажми яна оширилиши мумкин. Бу ҳақда BBC хабар берди.
Кремль Россия нефть ва нефть маҳсулотларини жаҳон бозорига етказиб беришга тайёрлигини тасдиқлади. Россия бош вазири ўринбосари Александр Новак эса дизель экспортига қўйилган чекловларни бекор қилиш бошланаётганини билдирди.
Трамп келишув ёқилғи нархининг тез пасайишига олиб келишини айтган. Бироқ таҳлилчилар ваъда қилинган ҳажм АҚШдаги нархларга сезиларли таъсир кўрсатишига шубҳа билан қарамоқда. Мамлакатда дизель нархи февраль ойи охиридан бери 67 фоизга ошган. Бу ҳолат 3 ноябрь куни бўлиб ўтадиган Конгрессга оралиқ сайловлар арафасида республикачилар учун муаммо туғдирмоқда.
Украина президенти Владимир Зеленский эса Россияга нисбатан санкцияларни юмшатишни танқид қилди. Унинг фикрича, Москвага нефть маҳсулотларини сотишга рухсат бериш Россияга урушни давом эттириш учун қўшимча маблағ олиш имконини беради.
Шу билан бирга, АҚШ ва Украина вакиллари Флоридада урушни тугатиш йўлларини муҳокама қилган. Трампнинг махсус вакили Стив Уиткофф учрашувда энергетика хавфсизлиги, дон экспорти ва хавфсизлик кафолатлари масалалари ҳам кўриб чиқилганини маълум қилди. Унинг айтишича, томонлар урушни тугатиш бўйича дипломатик саъй-ҳаракатларни давом эттиришга келишган.
