Февраль ойидаги ҳалокатли зилзилалардан сўнг Туркияга ёрдам қўлини чўзган Ўзбекистоннинг хайрия ёрдами доирасида Ҳатай вилоятида ҳар бирида бир оила сиғадиган 100 та турар-жой контейнер иншооти ўрнатилмоқда.
Модулли уйлар Истанбулдаги ўзбек диаспораси томонидан 2016 йилда ташкил этилган Сейҳун таълим ва маданият уюшмасининг бевосита кўмагида ўрнатилмоқда.
Зилзиладан кейинги дастлабки кунларданоқ ассоциация ўзбек халқи кўмагида жабрланган ҳудудда иссиқ овқат тарқатишни ташкил қилган. Умуман олганда, уюшма томонидан Овакент ҳудудида 100 та контейнер ўрнатиш режалаштирилган.
Уюшма раҳбари Тоҳир Абдулла “Анадолу” билан суҳбатда зилзилалардан сўнг Ўзбекистон халқи катта ёрдам кўрсатганини айтган.
“Кейинроқ Туркия ҳукумати Фавқулодда вазиятларни бошқариш ва олдини олиш бошқармаси (АФАД) кўрсатмаси билан Антакяга етиб келдик. Овакент ҳудудида 100 та контейнер ўрнатишни режалаштирганмиз. Айни пайтда 80 дан ортиқ контейнер ўрнатиш учун қурилиш материаллари мавжуд. Контейнерларимизнинг ўзига хос жиҳати шундаки, улар йиғилиб, кўчирилиши мумкин бўлган тарзда ишлаб чиқилган”, — деди Абдуллахон.
Унга кўра, битта контейнернинг умумий майдони 21 квадрат метрни ташкил қилади. Унда ётоқхона, ошхона, ҳаммом ва ҳожатхона бор.
Абдулланинг айтишича, контейнерларни ўрнатиш ишлари 15 кун ичида якунланади. Уларда шу ҳудудга 1980 йилларда кўчиб келган ўзбек диаспораси вакиллари истиқомат қилади.
