Ольга Кабулниязова бугун Ўзбекистондаги болаларга мўлжалланган машҳур ижодий вокал студиясининг бадиий раҳбари сифатида келажак авлодга санъатнинг шу тури бўйича сабоқ бериб келмоқда.
Бугун учун болалик орзуларидан то халқаро ассоциациялар аъзолигигача босиб ўтган йўли ҳақида ҳикоя қиламиз. Болалигини у қуйидагича ёдга олади:
"Болалигимда жуда ҳаракатчан ва санъатга қизиқувчан бўлганман. Онамдан менга пианино олиб беришларини, мусиқа мактабига олиб боришларини сўраганман. Мактабда жуда яхши ўқидим, ҳатто мусиқа мактабидаги имтиҳонлардан аъло натижалар билан ўтганман. Ота – онам ютуқларимдан фахрланиб доим хурсанд бўлишар эди. Мактабимизда катта ашула бўйича хор бўлган ва бизларни давлат томонидан ўтказиладиган тадбирларга, концертларга ва бошқа мусобақаларга чақиришар эди ва биз кўпинча фахрли биринчи ўринни эгаллар эдик", дея болалик хотираларини ёдга олади Ольга.
Ольга Кабулниязова дарслардан сўнг мусиқа мактаби қошида очилган студияда ҳам вокал дарсларида қатнашган. Вокал бўйича севимли устози Александр Михайлович унга келажакда санъат саҳнасидаги юлдузлар қаторидан жой олиши мумкинлигига ишонтирган.
"Унинг сўзлари ҳали ҳам хотирамдан ўчмаган. Шунинг учун 2001 йилда мактабни битириб эстрада ва цирк колледжига вокал бўлимига ўқишга кирдим ва бу ерда республикамизнинг энг нуфузли машҳур устозларидан тахсил олдим. Айнан шу ерда кўнгил қўйган, севимли касбий фаолиятим бошланди. 2003 йилда “Zero” номи билан республикада машҳур бўлган поп гуруҳига кастинг эълон қилинган эди ва мен бу кастингдан мувафаққиятли ўтдим. Қисқа вақт ичида “Zero” гуруҳининг солистига айландим", - дейди санъаткор.
“Zero” гуруҳи Ўзбекистон, Россия ва Қозоғистон бўйлаб гастрол сафарларида бўлган. Бундан ташқари гуруҳ ўзининг бир қанча альбомларини чиқариб, 2004 йилда “Йилнинг очилиши” ва 2005 йилда “Йилнинг энг яхши гуруҳи” деб номланган миллий мукофотларга муяссар бўлган. Буларнинг барчасида Ольганинг муносиб ҳиссаси бор.
Ольга Ўзбекистон давлат консерваториясини муваффақиятли битирди. Айнан ўша пайтда у ўзининг болаларга мўлжалланган ижодий вокал студиясини очди. Шу кунгача ушбу студиянинг бадиий раҳбари ҳамда вокал бўйича келажак авлодга дарс бериб келмоқда. Студияда болалар вокал, актёрлик маҳорати ва рақс ўрганишади. Ҳозирги кунда студия республикада машҳур ва таниқли студиялардан бирига айланган.
Унинг шогирдлари миллий ва халқаро танловларда фаол қатнашиб, “Фиесталония”, “Шарқ юлдузи”, “Иқтидорли болалар”, “Ёз юлдузи”, “Иқтидорлар фестивали” ва бошқаларда биринчи, иккинчи ва учинчи ўринларни эгаллаб келмоқда. Унинг ўзи эса халқаро ва миллий конкурсларга жюри аъзоси сифатида таклиф қилинади.
Жумладан, 2020 йилдан бошлаб шу кунгача ”Славян бозори” номи билан машҳур бўлган халқаро вокал конкурсида ватанимиз ва чет элларда машҳур бўлган санъат арбоблари билан биргаликда жюри аъзоси сифатида қатнашиб келмоқда. Бундан ташқари телевизион миллий проект – конкурс “Талантлар шоуси”да республикамизда таниқли ва машҳур бўлган санъат арбоблари, хизмат кўрсатган ходимлар, композитор, музикантлар ва артистлар билан биргаликда хакамлик қилди.
2022 йилда вокал бўйича педагогларнинг Саша Дивайн бошчилигидаги ESTILL Master Trainer (USA) халқаро “IATS” ассоциациясига аъзо бўлди. У ассоциациянинг ишларида фаол қатнашиб, онлайн учрашувларда ҳамкасабалари билан мусиқа ва овозга тегишли бўлган долзарб мавзулар муҳокамасида доим фаол иштирок этади. 2023 йилда у фольклор фестивалларининг EAFF халқаро Европа ассоциациясининг аъзоси бўлди. UNESCO ёрдамида ўтказиладиган бу фестиваллар унинг шогирдлари учун катта имкониятлар очиб бермоқда. Чунки эндиликда улар эстрада санъати билан биргаликда халқ ижодий санъати билан ҳам танишишга ва тажриба орттиришга муяссар бўладилар.
"Ҳурматли мухлисларга ҳеч қачон ўз орзуларидан воз кечмасликни тилаб қоламан, чунки бу орзу ва умидларни амалга ошириш ўзимизнинг қўлимизда. Агар биз ўзимизни ўзгартира олсак, атрофимиздаги олам ҳам ўзгаради. Фақат биз ўзимиз меҳнатимиз, сабр – тоқатимиз, иродамиз ва истакларимизга содиқлигимиз туфайли орзу – умидларимизни амалга оширишимиз мумкин", - деб таъкидлайди у.
