Биринчи зиёратчилар 2023 йилги Ҳаж зиёратини адо этиш учун Тошкентдан Мадинага учиб кетишди

ЖАМИЯТ 04.06.2023, 08:37
Биринчи зиёратчилар 2023 йилги Ҳаж зиёратини адо этиш учун Тошкентдан Мадинага учиб кетишди

3 июндан 4 июнга ўтар кечаси маҳаллий вақт билан соат 02:00 да “Uzbekistan Airways” миллий авиакомпаниясининг бортида 240 нафар зиёратчиси бўлган илк рейси Тошкентдан Мадинага (Саудия Арабистони) учиб кетишди.

4-19 июнь кунлари Ўзбекистоннинг 10 та шаҳридан Мадинага парвозлар амалга оширилади. Бу йил энг кўп зиёратчилар Тошкентдан Ҳажга боради — 16 рейсда 5575 нафар йўловчи ташилади. Намангандан 14 та, Фарғонадан 6 та, Самарқанддан 4 та, Бухоро, Урганч, Қарши ва Термиздан 3 тадан рейс, шунингдек, зиёратчилар билан 2 та рейс Навоийдан, Нукусдан эса 1 та рейс амалга оширилади. Ўзбекистондан жами 15130 нафар зиёратчи Ҳаж зиёратини адо этади.

Бу йил ҳаж бошланиши билан пойтахт ҳаво бандаргоҳида қўшимча шарт-шароит ва қулайликлар яратилди — жўнаб кетиш залининг стерил зонасида бир вақтнинг ўзида 80 ва 60 кишини сиғдира оладиган иккита, эркаклар ва аёллар учун намозхона очилди. Бундан ташқари, ибодатхоналар олдида энди таҳорат олиш учун — эркаклар ва аёллар учун ҳам махсус хоналар мавжуд. Шу билан бирга, ҳожатхоналарнинг катта блоки фойдаланишга топширилган.

Эслатиб ўтамиз, мазкур рейслар давомида пойтахт аэропорти эстакадасида ҳаракатланиш вақтинча чекланади, терминалга кириш фақат йўловчилар учун очиқ бўлади. Шунингдек, Ўзбекистон мусулмонлари идораси зиёратчиларнинг яқинларига терминалда тиқилинч ҳолатни ва аэропорт ён атрофида тирбандликларни олдини олиш учун аэропортга келмасдан, ўз яқинларини масжидлардан кузатишни тавсия қилади. 

 

Шарҳлар

Об-ҳаво: Тошкент
Валюта курси
1