Ўзбекистонда аҳолини тадбиркорликка жалб қилиш, янги иш ўринларини яратиш орқали бандликни таъминлаш борасида тизимли ишлар амалга оширилмоқда. Бу борада қилинаётган ишлар орасида молиявий муассасалар ажратаётган имтиёзли кредитларнинг ҳам ўрни катта.
Darakchi.uz ана шундай банкнинг молиявий кўмагида фаолиятини амалга ошираётган тадбиркорлик обектлари билан яқиндан танишиш мақсадида Самарқанд вилоятида бўлди.
Кичик устахонадан йирик компаниягача…
Дастлаб Халқ банкининг молиявий кўмагида ўз ишини бошлаган “SAMPLASTSERVIS” MCHJдаги ишлаб чиқариш жараёнлари, бу ердаги шарт-шароитлар билан танишдик.
2008 йилда фаолиятини эшик-дераза йиғиш устахонаси сифатида бошлаган мазкур обект бугунги кунда металл эшик ва дераза ромлари ишлаб чиқариш билан шуғулланиб келмоқда. Корхонадаги замонавий ускуналар ишлаб чиқариш жараёнларида компаниянинг кенг технологик имкониятларини таъминламоқда.
Ҳамёнбоп нарх, қисқа вақтда сифатли маҳсулот тайёрлаш қуввати, ҳар бир хомашёни танлашда индивидуал ёндашув каби афзалликлари билан ажралиб турадиган корхонада бугунги кунда ПВХ профиллар, дераза ва эшик ромлари каби маҳсулотлар ишлаб чиқарилмоқда. Маҳсулотлар Германия ва Туркиядан келтирилган сифатли хомашёдан тайёрланади.
Замонавий ускуналар сотиб олиш ҳамда фаолият кўламини кенгайтириш мақсадида Халқ банкидан қарийб 800 млн. сўмлик кредит маблағи ажратилган корхонанинг бугунги кундаги йиллик даромади 46 млрд. сўмни ташкил этади. Корхона 120га яқин кишини иш ўрни билан таъминлаган.
Қўли гул тадбиркор аёл
Ҳунарманд Азиза Пўлатова тикувчилик йўналишидаги фаолиятини кенгайтириш мақсадида бизнесини юритаётган тадбиркор аёллардан. 10 дан ортиқ шогирдлар етиштирган тадбиркор фаолияти ортидан яқинларининг ҳам бандлиги таъминланишига ҳисса қўшиб келмоқда. Хусусан, унинг турмуш ўртоғи ва ўғли бугунги кунда терига расм чизиш бўйича қўшимча бизнесини йўлга қўйган.
Тадбиркор аёл томонидан атлас, адрас, банорас, беқасам ва шойи каби миллий матолардан тикилган либослар ўзининг бежирим дизайни, замонавийлик ҳамда миллийликни уйғунлаштирганлиги билан жуда харидоргир. Самарқандга ташриф буюрадиган сайёҳ борки, Азизанинг миллий дизайндаги либослари олдидан бефарқ ўтолмайди. У кийимларини хорижликлар мамлакатига қайтганидан сўнг ҳам алоқага чиқиб, буюртма қилаётганини фахр билан сўзлайди.
Қўли гул тадбиркор Азиза Пўлатова ҳунари ортидан турли нуфузли танловлар, миллий либослар намойишларида иштирок этиб, совринли ўринларни эгаллаб келмоқда.
Анъанани давом эттириб…
Конигиллик Дилфуза опа Раззоқова маҳалласида ҳунармандчилик билан шуғулланиб келмоқда. Дилфуза опанинг ота-боболари қўли гул ҳунарманд бўлиб, асосан сандиқсозлик билан шуғулланган. Фақат шу йўналиш билан қаноатланмаган Дилфуза опа Халқ банкидан 33 млн кредит олиб оилавий тадбиркорликни йўлга қўйди. Энди у нафақат сандиқсозлик, балки тикувчилик, тўқиш, заргарлик каби ҳунармандчиликнинг 6 йўналишида фаолият олиб бормоқда.
“Аввал маҳалламиздаги 12 нафар аёлни ишлатган бўлсам, эндиликда уларнинг сони 66 тага етди. Ходимларимнинг ярми уйда, ярми устахонамда ишлаб оиласига моддий ёрдам бериб келмоқда дейди”, Дилфуза опа.
Карим Зарипов
