davletovuz телеграм канали журналистларни судга берган давлат идоралари ва квази-давлат ташкилотлари сони ортиб бораётганига эътибор қаратди.
Ипакчилик қўмитаси раиси Баҳром Шарипов Kun.uz ва журналист Шокир Шариповни судга берди. Сайтда унинг ипакчилик соҳасидаги компаниялар билан алоқадор бўлиши мумкинлиги ҳақида мақола чоп этилган. Давлат хизматчиси раддия эълон қилиш, узр сўраш ва 1 млрд сўм товон пули тўлашни талаб қилган эди.
Бироз вақт ўтиб, Баҳром Шарипов судга берган даъво аризасини қайтариб олди ва суддан ишни кўрмасдан қолдиришни сўраган.
Шунингдек, "Ҳудудгаз" акциядорлик жамияти эса Anhor.uz веб-сайти устидан нашр чоп этган танқидий мақола юзасидан Ички ишлар органларига туҳмат важи билан шикоят киритган.
Журналистлар уюшмаси ижтимоий тармоқларда инсон шаъни, қадр-қиммати ерга урилиб, туҳмат, ҳақоратомуз чиқишлар каби салбий ҳолатларнинг олдини олиш ва ана шундай тармоқ эгаларини аниқлаш, хусусан, “Online muxbir” телеграм канали асосчисига нисбатан қонуний чора кўрилиши, канал томонидан тарқатилаётган қонунга зид ахборотларга тегишли тартибда жавоб берилишини сўраб ҳуқуқ-тартибот идораларига аризалар киритди.
davletovuz телеграм канали админи ушбу ҳолатларга жамаотчилик эътиборини қаратар экан, президентнинг бугунги инаугурациядаги нутқида иқтибос келтиради: "Биз демократия ва очиқлик сиёсатини изчил давом эттириб, конструктив мухолифат фаолиятини, сўз ва матбуот эркинлиги, фуқароларнинг ахборот олиш, ундан фойдаланиш ва тарқатишга бўлган ҳуқуқларини кафолатлаймиз", деб таъкидлаган давлат раҳбари.
