Украина президенти Владимир Зеленский БМТ Бош котиби билан 17 июлда муддати тугаган Қора денгиз дон ташаббуси атрофидаги вазиятни муҳокама қилди.
Украина раҳбари БМТ Бош котиби билан телефон орқали мулоқот қилганини айтди.
Давлат раҳбари "Россия жаҳон озиқ-овқат бозорини беқарорлаштиришга ҳаракат қилмоқда" ва "Украина озиқ-овқат экспортига қарам бўлган турли мамлакатлардаги 400 миллион кишининг ҳаётини хавф остига қўяди" деб даъво қилмоқда.
“Қора денгиз дон ташаббуси сақланиб қолиши керак. Биз жаноб Гутерриш билан Қора денгиздаги йўллар орқали озиқ-овқат хавфсизлиги ва озиқ-овқат таъминотини тиклаш учун масъул давлатлар билан ҳамкорликда ишлашга келишиб олдик”, — деб ёзди Зеленский Телеграмда.
Маълумот учун: 2022 йил 22 июль куни Истанбулда Туркия президенти Ражаб Тоййиб Эрдўғон ва БМТ Бош котиби Антониу Гутерриш иштирокида Украина портларидан ғалла хавфсиз ташиш бўйича келишув имзоланди.
Ҳужжатни Украина, Россия, БМТ ва Туркия вакиллари имзолади.
Туркия координациясида амалга оширилаётган келишув глобал озиқ-овқат инқирозини ҳал қилишга қаратилган.
Россия президенти матбуот котиби Дмитрий Песков душанба куни Москва дон келишувининг Россия қисми якунланиши биланоқ Қора денгиз келишувларини амалга оширишга дарҳол қайтишини айтди.
Россия Ташқи ишлар вазирлиги ҳам Ғарб Россия озиқ-овқат ва ўғитларига нисбатан санкцияларни тўхтатса, келишувга қайтишларини билдирди.
Украина президенти Зеленский БМТ ва Туркияга “дон келишувини” Россиясиз давом эттириш таклифи билан мактуб юборганини айтди.
“Украина, БМТ ва Туркия озиқ-овқат коридорининг ишлашини ва кемалар текширувини таъминлаши мумкин”, — деди Украина раҳбари.
