Давлат раҳбари атоқли давлат ва жамоат арбоби Каллибек Камаловнинг оила аъзолари билан учрашди. Хонадонида Қуръон тиловат қилиниб, марҳумнинг ҳаққига дуои фотиҳа қилинди.
Президент марҳумнинг ибратли ҳаёт йўли, эл-юрт равнақи йўлидаги хизматлари ва эзгу ишларини ёдга олди. Ўтганлар хотирасига эҳтиром кўрсатиш, катталарни эъзозлаш ёш авлод учун муҳим ибрат эканини таъкидлади.
Каллибек Камалов 2026 йил февраль ойида вафот этган. У кўп йиллар давомида Қорақалпоғистонда раҳбарлик лавозимларида фаолият юритиб, ҳудуднинг ижтимоий-иқтисодий ривожланиши, саноат ва қишлоқ хўжалигини тараққий эттириш, аҳоли турмуш фаровонлигини оширишга муносиб ҳисса қўшган.
Кейинги йилларда эса нуронийлар жамоатчилик кенгаши раиси сифатида кексаларни қўллаб-қувватлаш, жамиятда ҳамжиҳатликни мустаҳкамлаш ва ёшлар тарбиясида фаол иштирок этган.
Каллибек Камаловнинг хизматлари “Шуҳрат” медали ҳамда “Эл-юрт ҳурмати” ордени билан тақдирланган.
