АҚШлик йўловчи самолётда жанжал кўтариб, йўловчилар ва экипаж аъзоларини ҳақорат қилганидан сўнг ўриндиғига скотч ва пластик боғичлар билан боғлаб қўйилди. Бу ҳақда “The Guardian” хабар берди.
Маълум қилинишича, воқеа 3 сентябрь куни American Airlines авиакомпаниясининг 618-рейсида содир бўлган. 67 ёшли Лейн Лундин парвоз вақтида тартибсизлик келтириб чиқарган.
Далласдан Нью-Жерси штатининг Ньюарк шаҳрига йўл олган самолёт воқеа сабабли Балтимор/Вашингтон Тургуд Маршалл халқаро аэропортига йўналтирилган.
Шундан сўнг Лундин самолётнинг биринчи классдаги ўриндиғига ёпишқоқ лента ва пластик боғичлар ёрдамида маҳкамланган. Самолёт аэропортга қўнгач, у ҳибсга олинган.
Лундинга иккинчи даражали ҳужум ва тартибсизлик содир этиш айбловлари қўйилган.
Эртаси куни судда айбловлар ўқиб эшиттирилганида, у воқеаларни эслай олмаётганини айтган.
“Мен полиция ходимига ҳужум қилдимми? Унда шундай ёзилганми? Менинг кўзойнагим йўқ. Вой Худойим, қандай тартибсизлик... Мен ҳеч нарсани эслай олмайман”, деган Лундин.
Ҳодиса вақтида Лундинни жиловлашга ёрдам берган собиқ ҳуқуқ-тартибот ходими Хуан Мехианинг айтишича, йўловчи American Airlines ходимлари ва бошқа йўловчиларга нисбатан ирқий, қўпол ҳамда аёлларга нисбатан ҳақоратли сўзлар ишлатган.
Яна бир йўловчи Ричард Оленик эса Лундин ён-атрофидаги йўловчини ва вазиятга аралашишга уринган аёлни уришга ҳаракат қилганини билдирган.
Оленикнинг сўзларига кўра, скотч Лундиннинг ҳаракатларини чеклаган бўлса-да, у қаршилик кўрсатишда давом этган.
