Таиланд Бош вазири ва ички ишлар вазири Анутҳин Чанвиракун мамлакатда қонунбузарлик содир этаётган чет элликларга нисбатан чораларни кучайтириш зарурлигини айтди. У чет элликларга Таиландда хусусий қабристон ва диний муассасаларни рухсатсиз ташкил этмасликни тавсия қилди.
Анутҳин Чанвиракун 17 сентябрь куни Ички ишлар вазирлигида вилоятлар губернаторлари билан ўтказилган йиғилишда чет элликларнинг Таиланддаги фаолияти масаласига тўхталди. Унинг таъкидлашича, мамлакат қонунларига риоя қилиб, ҳалол меҳнат қилаётган ва маҳаллий аҳолидан фойдаланишга уринмаётган чет элликларга нисбатан эътироз йўқ.
Бироқ Бош вазир айрим чет элликларнинг рухсатсиз диний муассасалар ва хусусий қабристонлар ташкил этишга уринаётганини танқид қилди.
«Яқинда ҳатто хусусий қабристон ташкил этиш бўйича сўров тушганини эшитдим. Бу энди ҳаддан ташқари ортиқча. Бу ерга келишингизга рухсат берганимиз учун миннатдор бўлишингиз керак. Ҳалол меҳнат қилиб даромад топиш учун келинг. Агар ўлсангиз, ўз ватанингизга бориб ўлинг. Бу ерда ўлишингизнинг ҳожати йўқ. Биздан фойдаланишга уринманг», — деди у.
Анутҳин, шунингдек, чет элликлар Таиланд ҳокимиятининг рухсатисиз диний муассаса ташкил этмаслиги кераклигини айтди. У ҳатто ресторан очиш учун олинган лицензиядан фойдаланиб, амалда ибодатхона ташкил этиш ҳам мумкин эмаслигини таъкидлади.
Бош вазирнинг сўзларига кўра, Таиланд чет элликларни қабул қилишга тайёр, бироқ муносабатлар ўзаро манфаатли бўлиши лозим. Туризм мамлакатга маблағ ва инвестиция олиб келиши мумкин, аммо бу чет элликларга маҳаллий аҳолидан фойдаланиш ёки ноқонуний фаолият юритиш ҳуқуқини бермайди.
У чет элликларнинг ноқонуний фаолиятига, жумладан, «номдор шахслар» орқали бизнес юритиш ва рухсатсиз ишлаш ҳолатларига қарши қонун доирасида қатъий чора кўришни губернаторларга топширди.
Анутҳиннинг таъкидлашича, гап муайян бир миллат ҳақида эмас. У турли мамлакатлар, жумладан, Осиё, Яқин Шарқ, Марказий Осиё, Европа ва Африка давлатларидан келган чет элликларни назарда тутганини айтди.
Бу баёнот Таиландда Чаченгсао провинциясидаги яҳудий қабристони атрофидаги вазият кучайганидан кейин янгради. Мазкур қабристоннинг фаолият юритиш лицензияси 2023 йилда узайтирилмагани маълум қилинган. Расмийлар у ердаги қабрлар ва лицензия масаласини текширган.
