Ishonch.uz "Док 1 Макс" иши доирасидаги биринчи очиқ суд мажлисида жабрланган ота-оналардан интервью олди.
Сирожиддин Хасанов — "Док 1 Макс" дори воситаси туфайли 5 ёшли фарзандидан ажралган оталардан бири.
— Сурхондарё вилояти Қумқўрғон туманидан келдим, — дейди у. — Фарзандим Хумоюн Эркиновга оддий шамоллашга қарши "Док — 1 Макс" сиропини олиб ичирган эдик. Болам уни 3 кун ичгач, пешоб ажралиши тўхтади. Қусиб чиқди тонг отгунча. Кейин Қумқўрғон тиббиёт бирлашмасига олиб бордик. У ерда болани «отравление» бўлган, сариқ касал бўлган, деб ташхис қўйишди, осма уколлар қуйди. Аммо осма укол ҳам кетмай қолди. Шундан кейин Термиз шаҳридаги катта касалхонага олиб бордик. У ерда эса, ўткир буйрак етишмовчилиги деб ташхис қўйишди. Уларда ёш болалар учун фильтр йўқ экан, шунинг учун эртасига 21 декабрь куни Тошкентга 16- шифохонага келдик.
У ерда 1 ой-у 3 кун бўлдик. Болам 10 кун ўзида бўлди, кейин комага тушди. Унинг ҳаётини сақлаб қолиш мақсадида Миллий болалар марказига олиб ўтдик. У ерга борганимизда ўғлим кома-3 ҳолатида эди. Кўрсаткич шу ҳолатдан пасга тушмади. Докторлар қаради, аммо боламда ўзгариш бўлмади, ўша вақтнинг ўзида бошини 2 марта операция қилишди. 5 ой давомида болам комада ётиб, 25 апрель куни — ўзимнинг туғилган кунимда жон берди…
— Суддан нима кутяпсиз? Айбланувчиларга қандай жазо берилишини сўрардингиз?
— Айбланувчиларга иложи бўлса, ўлим жазоси берилишини сўрайман. Мен бошқа нарса сўрамайман. Қонга қон — жонга жон. Ўлим жазосини берсин, менга ўхшаган мингга яқин ота-она бор. Касалхонада 5 ой юрганимда вазиятларни жуда яхши билдим. Телевизорда 18-20 та дейишди, улар ёлғон. Менга қўшилиб, "Док 1 — Макс" туфайли боласи вафот этганлар ўша вақтининг ўзида 1200 нафардан ошиқ, деб эшитгандим.
