Сирдарё вилоятининг Оқолтин туманида савдо билан шуғулланувчи аёлга шаҳвоний шилқимлик қилган эркак 5 суткага маъмурий қамоқ жазосига ҳукм қилинди. Бу ҳақда “Миллар” дастурида хабар берилди.
Маълум қилинишича, эркак М-39 халқаро автомобиль йўли бўйида савдо қилаётган аёлнинг ёнига маст ҳолда келган. У аёлга пул эвазига жинсий алоқа қилишни таклиф қилган ва унга нисбатан шаҳвоний шилқимлик қилган.
Шундан сўнг жабрланувчи ички ишлар органларига мурожаат қилган.
Суд мажлисида ҳуқуқбузар ўз қилмишини маст ҳолатда содир этганини тан олиб, енгиллик беришни сўраган. Жабрланувчи эса унга нисбатан қонун доирасида қатъий чора кўрилишини талаб қилган.
Суд қарорига кўра, эркак Маъмурий жавобгарлик тўғрисидаги кодекснинг 41¹-моддаси 1-қисми (шаҳвоний шилқимлик қилиш) билан айбдор деб топилиб, 5 сутка маъмурий қамоқ жазосига тортилган.
Шунингдек, суд жабрланувчига етказилган моддий ва маънавий зарарни ундириш учун фуқаролик ишлари бўйича судга мурожаат қилиш ҳуқуқи борлигини тушунтирган.
Аввалроқ Сурхондарёда ўқувчига шилқимлик қилган техникум ходими ишдан бўшатилгани хабар қилинганди. Шунингдек, Хоразмда ҳамширага шаҳвоний шилқимлик қилган шифокор 3 суткага қамалган. У навбатчилик вақтида аёлнинг телефонига бир неча бор шаҳвоний мазмундаги хабарлар юборган.
