"Вагнер" асосчиси Евгений Пригожин бортида бўлган самолётнинг қулаши билан боғлиқ вазият атрофида кўплаб тахминлар мавжуд, фактларни кутиш керак. Бу ҳақда Россия президенти матбуот котиби Дмитрий Песков маълум қилди.
Журналистнинг Кремлнинг Пригожин самолётининг уриб туширилишига алоқадорлиги ва бу қотиллик эканлиги ҳақидаги Ғарб версиясига изоҳ бериш сўраганида Песков “ҳаммаси ёлғон”, деб жавоб берди.
“Энди, албатта, ушбу авиаҳалокат атрофида, самолёт йўловчиларининг, жумладан Евгений Пригожиннинг фожиали ўлими атрофида кўплаб тахминлар бор. Албатта, Ғарбда бу тахминларнинг барчаси маълум бир бурчак остида тақдим этилади. Буларнинг барчаси мутлақо ёлғон. Бу масалани ёритишда сиз ҳали ҳам фақат фактларга асосланишингиз керак. Уларнинг сони ҳали кўп эмас, чунки ҳозирда олиб борилаётган тергов ҳаракатлари давомида уларга аниқлик киритилмаган. Кеча президент тергов натижаларини кутаётганини айтди”, — деди у.
Маълум қилинишича, сўнгги пайтларда Путин Кремлда Пригожин билан учрашмаган.
Кремль матбуот котиби, агар Пригожиннинг ўлими тасдиқланса, Путин дафн маросимида иштирок этадими, деган саволга ҳам жавоб бера олмади. Унинг таъкидлашича, тергов билан боғлиқ зарурий экспертиза ва керакли ҳаракатлар қанча давом этиши ҳозирча маълум эмас.
“Шунинг учун, ҳозир, дафн маросимининг саналари ва ҳоказолар бўлмаганда, бу ҳақда умуман гапириш мумкин эмас. Айтишим мумкин бўлган ягона нарса шундаки, президентнинг ҳозир жуда банд иш жадвали бор ", - деди Песков.
Эслатиб ўтамиз, 23 август куни Твер вилояти, Бологовский тумани, Куженкино қишлоғи яқинида самолёт ҳалокатга учради. Йўловчилар рўйхатида Евгений Пригожин ҳам бор эди.
