АҚШ ҳарбийлари шу баҳорда Форс кўрфазида сунъий интеллект хатоси туфайли тайёрланган разведка ҳисоботига ишониб, Хитой кемасини ушлаш ва унга қарши операция ўтказишга тайёргарлик кўрган. Бу ҳақда CNN вазиятдан хабардор бўлган тўрт манбага таяниб хабар берди.
Ҳисоботда Хитой кемаси Яқин Шарққа ҳарбий ядровий дастур учун компонентлар олиб кетаётгани айтилган. Шундан сўнг АҚШ ҳарбий қўмондонлиги кемани ушлаш операциясини тайёрлай бошлаган. Қуролланган ҳарбийлар кема бортига чиқишга тайёрланган, самолётлар эса ҳавога кўтарилган.
Бироқ операция бошланишидан олдин ҳисобот текширилиб, ундаги маълумотлар нотўғри экани аниқланган. Ҳисоботни махсус қўмондонлик таҳлилчиси кемадаги юкни нотўғри аниқлаган чат-бот ёрдамида тайёрлагани маълум бўлган.
Манбалардан бири ҳисобот бутунлай нотўғри бўлганини, аммо вазият АҚШ ва Хитой ўртасида қуролли можаро келиб чиқишига сал қолганини айтган. Чунки Хитой кемасига қарши ҳар қандай ҳарбий операция икки давлат ўртасида жиддий кескинликни келтириб чиқариши мумкин эди.
CNN маълумотига кўра, Пентагон ва разведка идоралари сунъий интеллектдан катта ҳажмдаги маълумотларни таҳлил қилиш, нишонларни аниқлаш, бюджет ва логистика жараёнларини бошқаришда тобора кенг фойдаланмоқда. Бироқ турли идораларда сунъий интеллект орқали олинган маълумотларни текшириш қоидалари бир хил эмас.
