Эрон Қатар воситачилигида АҚШга урушни тўхтатиш бўйича ўз шартларини етказди. Теҳрон барча фронтларда жанговар ҳаракатларни тўхтатиш, музлатилган маблағларини блокдан чиқариш ва денгиз блокадасини бекор қилишни талаб қилмоқда.
Бу ҳақда Эрон Миллий хавфсизлик олий кенгаши котиби Муҳсин Ризоий “Al Jazeera” телеканалига маълум қилди.
Унинг сўзларига кўра, Қатар воситачиси Эроннинг шартларини Вашингтонга етказган. Айни пайтда Теҳрон АҚШ президенти Дональд Трампнинг жавобини кутмоқда.
Ризоий, шунингдек, АҚШ ва Исроилнинг ҳаракатлари Эронни Ядро қуролини тарқатмаслик тўғрисидаги шартномадан чиқишга ундаши мумкинлигини айтди. Бироқ у Теҳрон ядро қуролидан фойдаланишни тақиқловчи фатвога содиқ қолаётганини таъкидлади.
Қайд этилишича, Қатар ва Покистон сўнгги вақтларда АҚШ ва Эрон ўртасидаги музокараларни қайта тиклаш бўйича воситачилик қилмоқда.
