Украина президенти Владимир Зеленский мудофаа вазири Алексий Резников ўрнига Давлат мулк жамғармаси раҳбари Рустем Умеровни тайинлаш истаги борлигини тасдиқлади. Бу ҳақда Владимир Зеленский 3 сентябрь куни кечки нутқида айтиб ўтган.
“Мен Украина мудофаа вазирини алмаштиришга қарор қилдим. Алексей Резников 550 кундан ортиқ давом этган кенг кўламли урушни бошдан кечирди. Ўйлайманки, вазирликка ҳарбийлар билан ҳам, бутун жамият билан ҳам янги ёндашувлар ва бошқа ўзаро ҳамкорлик шакллари керак. Энди вазирликка Рустем Умеров раҳбарлик қилиши керак. Украина Олий Радаси бу одамни яхши билади ва жаноб Умеровга бошқа таништириш керак эмас. Мен бу номзодни парламент қўллаб-қувватлашини кутаман”, — деди президент.
Зеленскийнинг сўзларига кўра, Олий Рада келаси ҳафта ушбу тайинлов учун овоз бериши керак.
Мусулмонлардан бўлган Умеров очиқ манбаларга кўра, Самарқанд вилояти Булунғур туманида туғилган.
Рустем Умеров номзоди Украина парламентига қачон тақдим этилиши ҳозирча аниқланмаган. Умеров аввалроқ Қрим-татар халқи мажлиси раҳбари Мустафо Жемилевнинг маслаҳатчиси бўлган ва ўтган йилнинг баҳорида Украинанинг Россия билан музокаралар олиб бораётган делегацияси аъзоси эди.
Украина парламенти депутати Олексий Гончаренконинг сўзларига кўра, мудофаа вазири лавозимидан кетганидан сўнг Олексий Резников катта эҳтимол билан Украинанинг Буюк Британиядаги элчиси этиб тайинланади.
