АҚШнинг Нью-Йорк штатида кучли ёмғир туфайли фавқулодда ҳолат эълон қилинди. Бу ҳақда губернатор Кети Хочул маълум қилди.
“Мен Нью-Йорк шаҳри, Лонг-Айленд ва Гудзон водийсида фавқулодда ҳолат эълон қиляпман, чунки биз бутун минтақада кучли ёғингарчиликни бошдан кечирмоқдамиз. Илтимос, хавфсизлик чораларини кўринг ва сув босган йўлларда ҳаракатланишга уринманг”, — деб ёзган Хочул ўзининг Х (собиқ Твиттер) ижтимоий тармоқдаги саҳифасида.
Бир неча метро линиялари ва ЛаГуардиа аэропорти терминали ёпилган. Нью-Йоркда баъзи кўчалар ва қатор биноларнинг пастки қаватлари, жумладан, мактаблар сув остида қолди.
