Саудия Арабистони 15 сентябрь куни мамлакатнинг бир қатор ҳудудларида, жумладан Макка ва Жидда шаҳарларида хавфсизлик огоҳлантиришларини эълон қилди. Бу ҳақда "Reuters" хабар берди.
Қайд этилишича, огоҳлантиришлар Эрон билан иттифоқчи ҳусийлар томонидан бир ҳафта давомида амалга оширилган ҳужумлар ортидан берилган. Мазкур ҳужумлар Саудия Арабистонининг Яқин Шарқдаги можарога янада чуқурроқ жалб этилиши хавфини оширган.
Огоҳлантиришлар кўп ўтмай бекор қилинган. Саудия расмийлари мамлакат ҳудудига учиб кирган снарядларнинг бирортаси ерга тушган ёки тушмагани ҳақида дарҳол маълумот бермаган. Шунингдек, ҳужумлар учун ҳеч ким масъулиятни ўз зиммасига олмаган.
Бу огоҳлантиришлар можаро ўтган ҳафта кескинлашганидан бери энг кенг қамровлиси бўлган. Макка шаҳрида хавфсизлик огоҳлантириши берилгани эса можаро бошланганидан буён биринчи марта қайд этилган. Шаҳарда мусулмонлар учун муқаддас бўлган зиёратгоҳлар жойлашган.
Эрон билан иттифоқчи ҳусийлар сўнгги кунларда Яманнинг Қизил денгиз соҳилидаги Боб ал-Мандаб бўғозига туташ ҳудудларнинг бир қисмини назоратга олган. Мазкур бўғоз дунёдаги муҳим денгиз йўлакларидан бири ҳисобланади. Ҳормуз бўғози орқали ташувлар издан чиққан бир пайтда бу ҳолат Саудия Арабистонининг нефть экспортига ҳам хавф туғдирмоқда.
АҚШнинг эҳтиёткор позицияси
Саудия Арабистони 2015 йилдан бери ҳусийларга қарши курашаётган коалицияга бошчилик қилади. Сўнгги йилларда ўт очишни тўхтатиш бўйича келишув туфайли можаро асосан пасайган эди. Бироқ ҳусийлар халқаро ҳамжамият томонидан тан олинган Яман ҳукуматига содиқ кучларни сиқиб чиқара бошлаганидан кейин жанглар жорий ойда яна авж олган.
Саудия валиаҳд шаҳзодаси Муҳаммад бин Салмон 15 сентябрь куни Қоҳирада Миср Президенти Абдулфаттоҳ ас-Сисий билан учрашди. Миср Президенти матбуот хизмати тарқатган баёнотга кўра, учрашувда Боб ал-Мандаб ва Қизил денгизда кемалар қатновининг эркинлиги ҳамда хавфсизлигини таъминлаш зарурлиги таъкидланган.
Муҳаммад бин Салмон 14 сентябрь куни Жиддада АҚШнинг минтақавий ҳарбий қўмондони, адмирал Брэд Купер билан ҳам учрашган. У, шунингдек, ўтган ҳафта АҚШ Президенти Дональд Трамп билан телефон орқали суҳбатлашиб, ҳарбий ёрдам сўраган.
Ҳозирча АҚШ томонидан кўрсатилаётган ёрдам разведка маълумотларини тақдим этиш билан чекланган.
