Фарғона вилоятдаги маъмурий қамоққа олинган шахсларни қабул қилиш ва сақлаш учун мўлжалланган махсус қабулхонада сақланаётган Х.Б.нинг яқинлари у сақланётган камера шароитлари яхши эмаслигидан шикоят қилишган. Бу ҳақда Олий Мажлиснинг Инсон ҳуқуқлари бўйича вакили (омбудсман) Ахборот хизмати маълум қилди.
Ҳуқуқбузар Х.Б.нинг сақланиш шароитлари ўрганиш жараёнида у Ўзбекистон Республикасининг “Маъмурий қамоқни ўташ тартиби тўғрисида”ги Қонунининг 20-моддаси талабларига зид равишда белгиланган камида 2,5 кв.м.дан кам бўлган камерада сақланаётганлиги аниқланган.
Шу куннинг ўзида Х.Б. бошқа камерага ўтқазилиб, мурожаат муаллифининг талаблари қаноатлантирилган.
Шу билан бирга унга келтирилган озиқ-овқат маҳсулотлари хам етказилиши таъминланган.
