"Ал-Наср' жамоаси 2 ноябрь куни Тошкентда "Пахтакор"га қарши майдонга тушади. Учрашувда португалиялик юлдуз Криштиану Роналду ҳам иштирок этиши мумкин.
Бу ҳақда FIFAнинг собиқ агенти Равшан Салимов ўзининг Telegram-каналида маълум қилди. Унинг айтишича, "Ал-Наср' менежерлари билан мулоқот давомида Роналдунинг Тошкентга келиши масаласига ойдинлик киритилган.
Салимовнинг таъкидлашича, футболчининг сафарда иштирок этиши бўйича якуний қарорни жамоа бош мураббийи қабул қилади. Шунга қарамай, клуб раҳбарияти олиб бораётган ташкилий ишлар Роналдунинг Тошкентга келиш эҳтимолини оширмоқда.
"Ал-Наср" футболчилари ва "Пахтакор" ўртасидаги баҳс Осиё Чемпионлар лигаси Элит турнирининг 4-тури доирасида ўтказилади.
Маълумот учун, турнирнинг дастлабки икки туридан кейин "Пахтакор" 2 очко билан 9-ўринни, "Ал-Наср" эса бир ғалаба ва бир мағлубиятдан сўнг 8-ўринни эгаллаб турибди.
