Айни пайтда Озарбайжон Республикаси таклифи ва ташаббуси билан Ўзбекистон Республикаси Президенти Администрацияси, Ахборот ва оммавий комуникацияларагентлиги, оммавий ахборот воситалари вакиллари, Ўзбекистон Нодавлат нотижорат ташкилотлар ассоциацияси ҳамда ННТ раҳбарларидан иборат делегация ушбу давлатда амалий ташриф билан бўлиб турибди.
Ташриф давомида Шуша, Фузулий районларидаги бунёдкорлик ишлари, шунингдек, нодавлат ташкилотлари, шу жумладан, замонавий медиа тизимининг давлат томонидан қўллаб-қувватлаш фаолияти билан яқиндан танишиш, тажриба алмашиш мақсад қилинган.
Куни кеча Фузулий шаҳридаги Ўзбекистон томонидан қурилган Мирзо Улуғбек номидаги 1-сонли мактабда Озарбайжон -Ўзбекистон нодавлат ташкилотларининг ҳамкорлик I форуми бўлиб ўтди.
Тадбир Қорабоғ озодлиги йўлида жангда шаҳид кетганлар учун бир дақиқалик сукут билан бошланди.
Форумда сўзга чиққанлар ўзбек-озар халқининг азалий бирдамлиги, қардошлиги ва яқин дўстона муносабатларини алоҳида эътироф этишди. Келгусида алоқаларни янада мустаҳкамлашда нафақат давлат органлари, муассасалар, балки нодавлат нотижорат ташкилотлар, ҳаракатлар ва бирлашмалар даражасида ҳам ҳамкорликни кучайтиришнинг зарурати ва аҳамияти қайд этилди.
Шунингдек, тадбирда ўзбекистонлик ННТ раҳбарлари фаолиятлари тўғрисида тақдимот ўтказишди.
Форум маданий тадбир билан якунланди. Эслатиб ўтамиз, ташриф 30 ноябрга қадар давом этади.
Ойбек Шукуров, Озарбайжон-Фузулий
