БМТ Инсон ҳуқуқлари қўмитаси Россия расмийларидан Алексей Навалнийнинг қаердалиги ва соғлиғи ҳақида маълумот беришни талаб қилди.
Бундан ташқари, БМТ адвокатларга Навалний билан зудлик билан учрашишга рухсат беришни талаб қилди.
Сиёсатчининг шериклари унинг қаердалигини аниқлашда БМТдан ёрдам сўрашган.
Сиёсатчининг адвокатлари, қариндошлари ва ҳамкорлари 6 декабрдан бери у билан алоқага чиқмаган. Дастлабки бир неча кун давомида унинг адвокатлари турли баҳоналар билан колонияга киритилмаган. Шундан сўнг суд Навалний 11 декабрь куни аниқ қаерда эканлигини кўрсатмасдан “Владимир вилоятини тарк этганини” айтди.
18 декабр куни Алексей Навалнийнинг колониядаги қамоқда сақлаш шароитлари ҳақидаги даъволарини кўриб чиқаётган судлар сиёсатчининг қаердалиги “аниқланмагунча” ишларни кўриб чиқишни тўхтатган.
Бунгача ҳам судларга сиёсатчини видео алоқа орқали учрашувларга олиб чиқмаган Федерал Жазони ижро этиш хизмати буни "электр билан боғлиқ муаммолар" билан изоҳлаган.
