Афғонистоннинг Бадахшон вилоятида ҳалокатга учраган Россиянинг Falcon 10 самолётидан 1,2 миллион доллар ўғирлаб кетилди. Бу ҳақда Hasht-e Subh Daily нашри маълум қилди.
Қайд этилишича, 21 январь куни “ГазПромАвиа”га тегишли бизнес-жет Гая—Тошкент—Москва йўналишида учаётганда ҳалокатга учраган, оқибатда икки йўловчи – тадбиркорлар Анна ва Анатолий Евсюковлар ҳалок бўлган. Экипажнинг тўрт аъзоси эса турли жароҳатлар билан шифохонага ётқизилган.
Портал маълумотларига кўра, ҳалокатга учраган самолётга биринчи бўлиб “Толибон” Қуролли кучлари штаби бошлиғи Фасиҳуддин Фитратга алоқадор бўлган бир гуруҳ одамлар етиб келган.
Ўғриликдан хабар топган Бадахшондаги “Толибон” губернатори Муҳаммад Аюб Холид воқеани текшириш учун комиссия тайинлади.
Шунингдек, ўғирланган пуллар кимга тегишли бўлгани очиқланмаган.
