АҚШда Жо Байден маъмурияти ва Техас штати губернатори Грег Абботт ўртасидаги "чегара хавфсизлиги" бўйича келишмовчиликлар авж олмоқда.
5 ноябрь куни АҚШда президентлик сайловлари яқинлашар экан, мамлакат жанубий чегаралари хавфсизлигини таъминлаш борасидаги мунозаралар янги кўринишга эга бўла бошлади.
Чегара хавфсизлиги ва ноқонуний иммиграция республикачилар ва демократлар ўртасидаги энг катта қарама-қаршиликлардан бири бўлиб, улар ўртасидаги баҳс Техасдаги АҚШ-Мексика чегарасида сим тўсиқлар ўрнатиш бўйича Олий суднинг сўнгги қарори муваффақиясизликка учраганидан кейин янада кучайди.
Техас штати томонидан чегаранинг айрим қисмларида ўрнатилган симли панжараларни олиб ташлаш тўғрисидаги Олий суд қарорига рози бўлмаган губернатор Абботт, Миллий гвардия бундай чора кўрмаслигини ва ҳатто “чегарани ҳимоя қилиш” учун янги панжара ўрнатишини айтди.
Абботт федерал ҳукуматни ҳаракасизликда айблаб, Байден маъмурияти штат чегараларини ноқонуний муҳожирлардан ҳимоя қилиш учун ҳеч нарса қилмаганини айтди.
Эслатиб ўтамиз, 25 штатнинг республикачи губернаторлари Техас расмийларининг ҳаракатларини қўллаб-қувватлаб, жанубий чегараларни қўриқлаш масаласида ҳар томонлама ёрдам беришга тайёр эканликларини маълум қилган эди.
Хусусан, бир қатор штатларнинг республикачи губернаторлари, асосан Оклахома, қўллаб-қувватлаш учун Техас штатига маълум миқдордаги Миллий гвардия қўшинларини юборишга ваъда берди.
АҚШнинг собиқ президенти, ҳозиргача республикачилардан президентликка энг кучли номзод бўлиб турган Доналд Трамп ҳам Техас ҳукуматини қўллаб-қувватлаган.
Трамп барча штатларни АҚШнинг жанубий чегараларини ноқонуний муҳожирлардан ҳимоя қилиш учун Техасга миллий кучларини юборишга чақирди.
Айни пайтда Америка оммавий ахборот воситаларида Байден маъмурияти Техас ҳукуматига Олий суд қарорини бажариш учун 24 соат вақт бергани ҳақида маълумот пайдо бўлди.
Мамлакатда Олий суд қарори қандай амалга оширилиши мумкинлиги ҳақида баҳс-мунозаралар давом этар экан, баъзи экспертлар Байден "Техас миллий гвардиясини федераллаштириши" мумкинлигини тахмин қилишди.
Гарчи Америка матбуоти Байденнинг бундай усулни танлаши сиёсий сабабларга кўра қийинчиликларга тўла бўлишини ёзса-да, ҳамма кескинлик қандай якунланишини интиқлик билан кутмоқда.
