Хабарингиз бор, 23 февраль куни “Sevimli” телемедиа-мажмуасининг анжуманлар залида “Маданий мерос – Италия ва Ўзбекистон ўртасидаги кўприк” медиа-тадбири бўлиб ўтди. Тадбир доирасида янги “Ўзбекистон маданий мероси Италия тўпламларида” китоб-альбомининг тақдимоти ўтказилди. Тадбир Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти (WОSCU) ҳамда Италия Республикасининг Ўзбекистондаги элчихонаси томонидан, “Ўзбеккино” миллий агентлиги ҳамкорлигида ташкил этилди.
Тадбирда Италия ва ўзбек кинематографлари ҳамкорлигидаги лойиҳалар – “Марко Поло” ҳамда “Хўжа Насриддин” ҳужжатли фильмлари намойиши ҳам бўлиб ўтди.
“2022 йилда бизнинг V&Cо телекомпаниямиз Марко Поло ҳақида, унинг Ўзбекистон ҳудуди орқали Италиядан Осиёга бўлган ажойиб саёҳати ҳақида ҳужжатли фильм суратга олди. Бу бизнинг Ўзбекистон Республикаси Кинематография агентлиги ва президенти Пинакотека Бре́ра директори Др. Жеймс М. Бредберн бўлмиш Associazione Circles Squared (Италия) билан ҳамкорликдаги халқаро лойиҳадаги илк тажрибамиз эди. Бу тажриба бизни Ўзбекистон Кинематография агентлиги билан биргаликда Хўжа Насриддин ҳақида янги лойиҳа яратишга илхомлантирди. Бу Миланнинг энг қадимги қўғирчоқ труппаси – Cарло Cолла & Figli қўғирчоқ театри актёрлари ва қўғирчоқлари иштирокидаги жуда ноодатий фильм бўлади”, – деди V&CО телекомпанияси продюсери Алёна Михайлова.
