Кинематография aгентлиги раҳбарияти ва Тошкент шаҳри кинотеатрлари директорлари иштирокида кинопрокат масалаларига бағишланган анжуман ташкил этилди. Бу ҳақда darakchi.uz мухбири хабар берди.
Йиғилишда кинотеатрларда хориж фильмларини давлат тилида намойиш этишдаги муаммолар муҳокама қилинди.
Маълумот ўрнида, Ўзбекистон Республикаси Президентининг 2018 йил 24 июлдаги ПҚ-3880-сон қарори асосида 2019 йил 1 январдан бошлаб ҳажми бўйича квота тизими жорий этилгани таъкидланди. Қарорга асосан мулкчилик шаклидан қатъий назар, мамлакатимиз кинотеатрларида кунига камида иккита тўлиқ метражли, ойлик экран ҳажмининг камида 25 фоизи миқдорида миллий бадиий фильмларни намойиш этилиши керак. Байрам кунлари эса 40 фоиз миқдорида.
Анжуман муҳокамасида таъкидланганидек, кинотеатрлар директорлари ва агентлик ходимлари кинопрокатнинг мавжуд муаммоларини ҳал этиш ва хорижий фильмларни ўзбек тилига дубляж қилиш бўйича ишчи гуруҳ тузишга келишиб олишди.
