Яқин бир неча йил олдин бутун дунё бўйлаб тарқалган ковид-19 ва унинг инсониятда қолдирган унутилмас хотиралари кўпчиликнинг эсида бўлса керак. Ўзбек санъати ижодкорлари ўша йилларда халқ учун беминнат хизмат қилган, юксак матонат кўрсатган касб эгалари, яъни шифокорларга бағишланган “Пандемия” номли фильм суратга олишди. Биз фильм ижодкорлари билан боғланиб, суратга олиш жараёнидан махсус материал тайёрладик.
Аброр НАБИЕВ, Фильм продюсери ва ғоя муаллифи:
— Бу фильмни суратга олишдан мақсад, юртимизда коронавирус авж олган пайти, оддий инсонлар тўрт девордан ташқарига чиқишга имконсиз бўлиб қолганда ҳеч нарсадан қўрқмасдан, аввало, ўзини, оиласини ва яқинларининг ҳаётини хавф остига қўйиб, жасорат кўрсатган инсонлар, яъни шифокорларимиз ҳақида фильм яратиш эди. Ҳозир балки бизга айтишга осондир биз вирусни енгиб ўтдик, деб. Лекин тан олиш керак, агар ўша пайтда шифокорларимиз бўлмаганда биз ковидга қарши курашолмасдик. Балки бутунлай йўқ бўлиб кетишимиз ҳам мумкин эди. Шунинг учун доим айтаман, шифокорларимизга ҳайкал қўйиш керак. Фильм ғоясига келадиган бўлсак, коронавирус авж олган пайтда мен ҳам вирус юқтириб, шифохонага тушиб қолгандим. Ижодкор инсон хоҳ соғ-саломат бўлсин, хоҳ касал бўлсин, хаёлида ҳеч қачон тиним бўлмайди. Доим нималарнидир ўйлаб, хаёлида сценарий тузиб юради. Мен ҳам шифохонада ётган пайтим шифокорларнинг ишини диққат билан кузатганман ва ўша ерда айнан уларга бағишланган фильм суратга олиш ғояси туғилган. Сценарийни Ҳуснулла Жамонқулов билан бирга ёзганмиз. Уни ёзиш ҳам осон бўлмаган, 4-5 ой вақтимиз сценарийнинг ўзига кетган. Концултантларга учрадик, маслаҳат олдик. Айтмоқчиманки, ҳеч бир ишни қўл учида қилмадик.
— Актёрлар кастинг қилиндими?
— Актёрларга келадиган бўлсак, биз фотопроба ўтказдик. Фильмда суратга тушганларни суратдаги нигоҳлар, кўз қарашлар, юз ифода ва характердан келиб чиқиб танлаганмиз. Ва танланганлар айнан шу ролни гавдалантиришни хоҳлагандим, деб мамнун бўлишди.
— Фильмдан ўзингизни кўнглингиз тўлдими?
— Очиғини айтсам, фильм ўзимнинг ғоям асосида яратилган ва шу ғоя асосида суратга олинган бўлса ҳам, мен ўзимга 100 фоиз ёқди, деёлмайман. Профессионал даражада суратга олинган бўлса ҳам, мен ўзим хоҳлагандай нарсани чиқара олдим деб ўйламайман. Фильмни суратга олиб бўлгач ҳам, халққа еткизолмадим деган ҳаяжон бор ҳалигача. Ёқди, зўр деб айтишим қийин. Балки ташқи тарафдан зўр чиққан бўлиши мумкин, профессионал даражада ёндашгандурман, лекин ўзимни кўнглим тўлмади. Энди фильм катта экранларга чиққанидан сўнг буёғини томошабинларнинг фикрини билганимдан кейин, уларнинг илиқ муносабатини сезсам, балки кўнглим тўлар.
— Фильм премьераси қачон бўлади?
— Премьера Худо хоҳласа тез кунда бўлиб ўтади. Юртимиздаги барча кинотеатрларда қўйилади. Яна бир муҳим жиҳат, фильм икки тилда, яъни ўзбек ва рус тилида дубляж қилиниши режалаштирилган. Сабаби фильм фақат Ўзбекистонда эмас, балки қўшни давлатларда ҳам экран юзини кўришини хоҳлаймиз.
Тез орада darakchi.uz’да ушбу фильмда суратга тушган актёр-актрисалар билан суҳбатни ўқишингиз мумкин...
