Кинематография агентлиги буюртмасига биноан Иброҳим Расулов режиссёрлигида суратга олинган "Ишқ ва андуҳ" бадиий фильмининг илк катта премьераси ўтказилди.
Премьера аввалида фильм ижодкорлари саҳнага таклиф қилиниб, фильм режиссёри Иброҳим Расулов фильм яралиши ҳақида қисқача гапирди. Шунингдек, режиссёр кинокартина босқичма-босқич суратга олиниб, 7 йил давомида тамомланганини, фильм Ўзбекистонда хизмат кўрсатган артист Аида Юнусованинг энг сўнгги ижроси бўлганини ҳам эслади.
Фильмда Ўзбекистон халқ артистлари Эркин Комилов ва Теша Мўминов ҳамда Умид Искандаров, Гулбаҳор Дадамирзаева, Машҳура Зулфиқорова каби актёр ва актрисалар роль ижро қилган. Мазкур фильм Гулчеҳра Эшонқулованинг энг сўнгги ролларидан бири эди.
Сценарий муаллифи Микаил Сулаймонов, оператор Талъат Мансуров. Кинокартина Наргиза Усанбоеванинг "Ишқ ва андуҳ оғушида" қиссаси асосида суратга олинди.
