Кеча, 19-июль куни транспорт вазири Илҳом Махкамов Европа тикланиш ва тараққиёт банки Марказий Осиё ва Мўғулистон бўйича директори Хусейн Озхан бошчилигидаги делегация вакиллари билан учрашди.
Учрашувда мамлакатимиз транспорт тизими ва инфратузилмасини ривожлантириш борасида амалга оширилаётган лойиҳалар юзасидан фикр алмашилди.
Хусусан, “Тошкент – Самарқанд” пуллик автомобиль йўлининг техник-иқтисодий асосини якунлаш ҳамда Самарқанд шаҳри учун электробусларни харид қилиш лойиҳалари доирасида амалга оширилаётган ишларни жадаллаштириш масалалари муҳокама этилди.
Шунингдек, томонлар Нукус ва Наманган шаҳарлари учун электробуслар ҳамда Самарқанд шаҳри учун трамвай харид қилиш бўйича истиқболли лойиҳаларини амалга ошириш юзасидан фикр алмашди.
Ушбу лойиҳаларни амалга ошириш бўйича ҳамкорликдаги ишларни давом эттиришга келишиб олинди.
