Наманган вилояти Чуст туманида жойлашган аттракционда 10 киши учаётган вақтда аттракцион бузилиб қолди. Бу ҳақда Чуст туман ҳокимлиги ахборот хизмати хабар берди.
Ҳодиса 30 июль куни соат 17:45 ларда "Чуст" эко паркида содир бўлган. Аттракционнинг занжирлари йиғилмай қолиб, тепадан пастга белгиланган тезликда тушиб келаётганида юқоридаги фуқаролардан 8 нафари атрофдаги дарахтларнинг шох-шаббаларига урилиб, турли даражада тан жароҳатлари олган. Уларга касалхонада тиббий ёрдам кўрсатилган.
Аниқланишича, жабрланувчиларнинг 2 нафари аёл, 4 нафари вояга етмаган қиз ва 2 нафари вояга етмаган ўғил болалар бўлган.
Чуст туман ҳокимлигининг маълум қилишича, 3 нафар фуқаро енгил тан жарохати олган. 1 нафар фуқаронинг оёқ сон суяги cинган.
Ушбу ҳолат юзасидан тегишли ташкилот ходимлари ўрганиш ишларини олиб бормоқда.
