“Тоштурма”даги махбуслар вақтида сув берилмаётганидан нолишмоқда

Бу ҳақда ўз саҳифасида ёзиб қолдирган адвокат Абдумалик Абдуллаев Олий Мажлиснинг Инсон ҳуқуқлари бўйича вакили (Омбудсман)ни зудлик билан юқоридаги ҳолатларни ўрганишга чақирмоқда.

 Адвокат халқ тилида "Тоштурма" номи билан танилган, Ўзбекистон Республикаси ИИВ ҳузуридаги ЖИЭД Марказий тергов ҳибсхонасида сақланаётган маҳбуслар иссиқ  кунларда муассасада сув таъминотида жиддий узилишлар бўлаётганлигидан, хусусан суткасига атига 4-6 соат давомида сув берилаётганлигидан оммавий норозилик кайфияти юзага келганлигини қайд этган.

Шунингдек, камераларда белгиланган меъёрдан ортиқ маҳбуслар сақланишига йўл қўйилаётганлиги, маҳбусларнинг соғлиғи борасида етарлича қайғурилмаётгани, тиббий хизмат талаб даражасида йўлга қўйилмаганлиги ҳам норозиликлар кўламини янада кучайтираётгани жиддий эътиборни талаб этади.