Ўзбекистонлик гроссмейстер Жавоҳир Синдаров Халқаро шахмат федерациясининг (ФИДЕ) классик шахмат бўйича жонли рейтингида жаҳоннинг учинчи рақамли шахматчисига айланди. Бу ҳақда “UzChess” хабар берди.
Қайд этилишича, бу Ўзбекистон шахмати тарихидаги илк шундай натижа ҳисобланади.
Америкалик гроссмейстер Фабиано Каруана АҚШ чемпионати доирасида Энди Вудвордга мағлуб бўлганидан сўнг, Синдаровнинг рейтинги 2782 очкога етди. Натижада у жонли рейтингда Каруанадан ўзиб кетиб, учинчи ўринни эгаллади.
Рейтингнинг юқори поғоналаридан норвегиялик Магнус Карлсен 2823 очко билан биринчи, америкалик Ҳикару Накамура эса 2792 очко билан иккинчи ўринни банд этган.
Шунингдек, яна бир ўзбекистонлик гроссмейстер Нодирбек Абдусатторов ҳам жаҳоннинг энг кучли шахматчилари бешлигидан жой олган. У 2780 очко билан бешинчи ўринда бормоқда.
Эслатиб ўтамиз, жорий йилнинг сентябрь ойида Самарқандда ўтказилган 46-Бутунжаҳон шахмат олимпиадасида Ўзбекистон терма жамоаси олтин медални қўлга киритган эди. Жавоҳир Синдаров ҳам жамоа ғалабасига муносиб ҳисса қўшган.
Маълумот учун, Синдаров 24 ноябрдан 12 декабрга қадар Женевада ўтказилиши режалаштирилган Жаҳон тожи учун баҳсларда иштирок этади.
