ЎзЛиДеП партияси ўз фаолиятида давлат томонидан иқтисодиётни назорат қилинишини чеклаш, одамларнинг ҳаёти эркин ва фаровон бўлиши лозимлиги, бизнес юритиш осон ва қулай бўлиши, солиқлар паст бўлиши, бюрократик тўсиқлар бўлмаслиги ҳамда иқтисодиёт рақобатга асосланиши каби ғояларга асосланади.
Мамлакатимизда бизнесни ривожлантириш ва қулай ишбилармонлик муҳитини яратиш кўп жиҳатдан мазкур соҳадаги қонунчиликни либераллаштиришга боғлиқ. Соҳадаги қонунчиликни либераллаштирилиши янги тадбиркорлик субьектларининг вужудга келишига ҳамда кўплаб иш ўринларини ташкил этишга замин яратади.
Шу нуқтаи назардан, ЎзЛиДеП томонидан илгари сурилаётган тадбиркорлик билан боғлиқ жиноят турларини камайтириш, соҳани либераллаштириш, қонуний ишлаётган ва солиқларни вақтида тўлаётган тадбиркорларни текширмаслик, тадбиркорлар фаолиятига белгиланган ҳоллардан ташқари аралашгани учун мансабдор шахсларга жавобгарликни кучайтириш ҳамда мансабдор шахсларнинг фермерлар фаолиятига (ҳосилни сотиш, нарх белгилаш ва б.) аралашувини қатъий тақиқлаш каби масалалар долзарб аҳамиятга эга.
Мазкур ташаббуслар тадбиркорлар ва ишбилармонларга кўплаб имкониятларни яратиб беради. Жумладан, тадбиркорлик соҳасида ишончли ҳуқуқий муҳит яратилади ва сармоядорларни жалб қилиш имкониятлари ошади. Шу сабабли, партия шу каби ташаббуслар орқали тадбиркорларнинг ҳуқуқ ва эркинликларини ҳимоя қилиш, қулай бизнес муҳитини яратиш, улар фаолиятига ноқонуний аралашувларнинг олдини олишга интилмоқда.
Мазкур ташаббусларнинг ҳаётга изчил татбиқ этилиши янги тадбиркорлик субъектларини ташкил этиш, уларнинг солиқ интизомини мустаҳкамлаш ҳамда аҳоли учун қўшимча иш ўринларини яратишга имконият беради. Буларнинг ҳаммаси мамлакат иқтисодиётини ривожлантириш ва аҳоли фаровонлигини юксалтириш каби асосий ғояларнинг рўёбга чиқишига хизмат қилади.
