Польшанинг Тиббий маҳсулотлари, тиббий жиҳозлар ва биоцид маҳсулотларини рўйхатдан ўтказиш идораси президенти Гжегож Чесак бошчилигидаги делегациянинг Ўзбекистонга ташрифи ташкил этилди. Бу ҳақда Элчихона расмий каналида хабар берилди.
Маълум қилинишича, Фармацевтика маҳсулотлари хавфсизлиги маркази директори Алишер Темиров билан ўтказилган учрашув якунида ҳамкорликда фаолият олиб боришга келишилган йўналишлардаги ишларни амалга ошириш бўйича аниқ ҳаракатлар режасидан иборат бўлган йўл харитаси имзоланди.
Фармацевтика тармоғини ривожлантириш агентлиги директори Абдулла Азизов билан бўлиб ўтган музокараларда томонлар икки томонлама ҳамкорлик ва тартибга солувчи органлар ўртасида маълумот алмашиш зарурлиги тўғрисида келишувга эришдилар.
Шунингдек, Савдо-саноат палатаси раиси ўринбосари Дилшод Расулов ва Польша Маданият ва миллий мерос вазирлиги давлат котиби Божена Желазовска бошчилигидаги делегация ўртасида учрашув бўлиб ўтди.
Унда Ўзбекистоннинг Польшадаги элчиси Амирсаид Агзамхўжаев ҳам иштирок этди.
Учрашувда Ўзбекистон-Польша муносабатларининг ҳозирги ҳолати, сиёсий, савдо-иқтисодий, маданий-гуманитар ва бошқа соҳаларда алоқаларни янада ривожлантириш нуқтаи-назаридан муҳокама қилинди.
Шуниндек, Ўзбекистонда хотин-қизларни давлат бошқарувида фаолигини ошириш, аёллар тадбиркорлигини ривожлантириш борасида амалга оширилаётган ишлар ва сўнги йилларда эришилган натижаларга тўхталиб ўтилди.
Маълумот учун, 19-25 сентябрь кунлари Ўзбекистонда “Ўзбек-польяк ҳамкорлик ҳафталиги” бўлиб ўтмоқда.
