Ўзбекистон Президенти Шавкат Мирзиёев ва Туркия Президенти Режеп Таййип Эрдоған Анқарадаги олий даражадаги музокаралар якунида икки томонлама ҳамкорликни кенгайтиришга қаратилган қатор ҳужжатларни имзолади.
Хусусан, томонлар Бизнесни қўллаб-қувватлаш бўйича юқори даражадаги кенгашни таъсис этиш тўғрисидаги битимни имзолади.
Шунингдек, икки мамлакат ўртасидаги кўп қиррали ва узоқ муддатли шерикликни ривожлантиришга қаратилган қуйидаги ҳужжатлар қабул қилинди:
— Имтиёзли савдо битими доирасида товарлар рўйхатини кенгайтириш тўғрисидаги баённома;
— Ижтимоий таъминот тўғрисидаги ҳукуматлараро битим ҳамда уни амалга ошириш бўйича маъмурий битим;
— 2022 йил 29 мартда имзоланган давлат чегаралари орқали товарлар ва транспорт воситаларининг ўтиши ҳақида олдиндан ахборот алмашиш тўғрисидаги баённомага ўзгартиришлар киритиш ҳақидаги қўшимча баённома.
Қайд этилишича, имзоланган ҳужжатлар савдо-иқтисодий ҳамкорликни кенгайтириш, ишбилармон доиралар учун қулай шарт-шароитлар яратиш ҳамда икки мамлакат фуқароларининг ижтимоий ҳуқуқларини ҳимоя қилишга хизмат қилади.
