Саломатлик учун жиддий хавф туғдирувчи маҳсулотлар импортини чеклаш зарур.
Ўзбекистон Экологик партияси фитосанитария талабларига жавоб бермайдиган, саломатлик учун жиддий хавф туғдирувчи маҳсулотлар импортини чеклаш зарур, деб ҳисоблайди.
Бу ҳақда партия раҳбари Абдушукур Хамзаев сирдарёлик сайловчилар билан бўлиб ўтган учрашувда маълум қилди.
Партия раҳбари учрашувда озиқ-овқат маҳсулотларини ишлаб чиқаришни экологик талабларга тўлиқ мослаштириш, синтетик гўшт каби озиқ-овқат маҳсулотини ишлаб чиқариш ва сотишга қарши курашиш ҳам Ўзбекистон Экологик партиясининг сайловолди дастурида белгилангани ҳақида маълумот берди.
Жумладан, А.Хамзаев қишлоқ хўжалиги ва озиқ-овқат маҳсулотлари етиштирувчиларни иқлим ўзгариши оқибатлари таъсиридан ҳимоя қилиш ҳамда форс-мажор ҳолатларда уларни давлат томонидан қўллаб-қувватлаш механизмларини қайта кўриб чиқиш масаласи партия эътиборидаги асосий вазифалардан эканини қайд этди.
Шунингдек, қишлоқ хўжалиги соҳасида суғурта бозорини такомиллаштириш ва суғурта хизматлари сифатини ошириш, ушбу соҳада жисмоний ҳамда юридик шахсларнинг ҳуқуқларини ҳимоя қилишни кучайтириш ҳам мақсад қилинганини айтиб ўтди.