Бир гуруҳ абитуриентлар Билим ва малалакаларни баҳолаш агентлигини судга берди. Бу ҳақда адвокат Мухриддин Шамсиддинов маълум қилди.
"Жорий йил июль ойида юридик йўналишларга имтиҳон топширган абитуриентларга моддалар санкцияларидан (қанча жарима белгиланган, неча йилга "қамалади" каби) саволлар тушган. Университетда ўқиб юрган вақтларимда устозларим модда санкциясини ёдлашни қатъий ман этарди. Яъни биз умуман санкция ёдламасдик. Чунки биринчидан, ёдлашни умуман имкони йўқ, иккинчидан, бу келгуси фаолиятда умуман керак бўлмайди", деб ёзди адвокат.
Шамсиддинов адвокат сифатида ишга киришганини маълум қилди. Иш Тошкент туманлараро маъмурий судида кўриб чиқилиши мумкин.
Аввалроқ, ҳуқуқшунослик фанидан тест ечган абитуриентлар Билим ва малакаларни баҳолаш агентлиги тавсия этмаган қонун ва кодекслардан савол-топшириқлар тушгани бўйича шикоят қилган эди.
Бунга жавобан Билим ва малакаларни баҳолаш агентлиги тавсия этилган дарсликлар ва ўқув адабиётлари рўйхатини ўз сайтига аввалдан жойлаштирганини маълум қилган. Амалдаги давлат таълим стандартлари ва ўқув дастурларидан четга чиқиш ҳолатлари бўлмаганини таъкидлаган. Ҳуқуқшунос Хушнудбек Худойбердиев эса агентликнинг бу баёнотини "ёлғон ва сафсата" деб атаганди.
