Наманганда фуқаролардан асоссиз маблағ олган чиқинди ташиш корхонасига иш қўзғатилди. Бу ҳақда Рақобат қўмитасининг матбуот хизмати хабар берди.
Қўмитанинг Наманган вилояти ҳудудий бошқармаси томонидан “Наманган Мусаффо Иқлим” корхонасининг жорий йилнинг биринчи ярмида маиший чиқинди ташиш хизматлари бўйича қонун талабларига риоя этганлиги ўрганилди.
Бунда корхонанинг Наманган шаҳар, Давлатобод, Янги Наманган, Тўрақўрғон, Наманган ва Мингбулоқ туманлари МФЙларидаги истеъмолчи абонентлар-хонадонларига хизмат кўрсатиш сифати бўйича олинган далолатномалар таҳлил қилинди.
Натижада, вилоятнинг 6та ҳудудида жойлашган 275 та МФЙда 1,3 млнга яқин аҳоли истиқомат қилишига қарамай, ташкилот томонидан ҳудудда 176 та МФЙдаги 633 598 нафар аҳоли (50,8%) қамраб олинмаганлиги аниқланди. Шу билан бирга, 762 512 нафар истеъмолчига кўрсатилмаган хизмат учун 11 млрд сўм миқдорида ҳақ ҳисобланган.
Ҳудудий бошқарманинг Махсус комиссияси томонидан “Наманган Мусаффо Иқлим"га нисбатан “Истеъмолчиларнинг ҳуқуқларини ҳимоя қилиш тўғрисида"ги қонуннинг 19 ва 21-моддалари талаблари бузилганлиги юзасидан иш қўзғатилди. Маблағларни қайта ҳисоб-китоб қилиш бўйича кўрсатма берилди, дейилади хабарда.
