Туркиянинг Малатя вилоятида 5,9 магнитудали зилзила юз берди.
Туркия ҳукумати қошидаги Фавқулодда вазиятларнинг олдини олиш ва табиий офатларни бошқариш бошқармаси (АФАД) сайтида маълум қилинишича, ер силкинишлари маҳаллий вақт билан соат 10.46 да қайд этилган.
Зилзила эпицентри Кале шаҳрида жойлашган.
Фуқаролар шоша-пиша уйлари ва идораларини тарк этиб, яқин атрофдаги боғ ва майдонларга тўпланишди.
Ер силкинишлари Шанлиурфа, Адияман, Килис, Газиантеп ва Қаҳраманмарас вилоятларида ҳам сезилган.
Каледаги бир қатор шикастланган бинолар қуршаб олиниб, кучайтирилган хавфсизлик чоралари кўрилган.
Малатя вилояти губернатори Седдар Явуз қурбонлар ҳақида маълумот йўқлигини айтди.
“Ижтимоий тармоқларда қулаган бино тасвирларини ҳам кўрдик, аммо бу эски фотосуратлар, кейин биз назорат остида бузишни амалга оширдик. Шунинг учун фуқаролардан ваҳима қўзғаши мумкин бўлган ёлғон суратларни тарқатмасликни сўраймиз”, — деди у.
Явуз, зилзиладан кейин текширув олиб борилаётганини, қурбонлар, тан жароҳати олганлар ёки вайронагарчиликлар ҳақида ҳеч қандай маълумот йўқлиги, одамлар шунчаки қўрқиб кетганини қайд этди.
Шу билан бирга, губернатор фуқароларни аввал эвакуация қилинган аварияли биноларга яқинлашмасликка чақирди.
Хавфсизлик чоралари сифатида мактаблар бир кунга ёпилган.
АФАД ҳудудий бошқармаси раҳбари Али Алтйндал қурбонлар ва вайроналар ҳақида маълумот йўқлигини тасдиқлаган.
Туркия Ички ишлар вазирлиги раҳбари Али Ерликая зилзила натижасида Малатяда бир, Шанлиурфа ва Элазиғда бир бино қисман қулаганини, қурбонлар ва моддий зарар йўқлигини маълум қилди.
Шошилинч тиббий ёрдам марказига 374 та мурожаат келиб тушган, 33 та ҳолатда фуқаролар ёрдам сўраган, дея қўшимча қилган вазир.
